عليك اتعلمت

تمر مرة مطر بيدك تجس الروح
شايل كل سواد الليل بعيونك
ألتمسك يامطر بس لا تغيب هواي
تره روحي جزيره وتيبس بدونك
عليك تعلمت وعضاي كلها تنوح
تفطمني غصب ترضى يفطمونك
أصومن عمري كله أتنطرك يهواي
ولا أمدن أديه لغير ماعونك
لا تنشد شلوني منين أجيب اللون
بعد ماظل عكل لاتنشد شلونك
يعبره بصدري أضمك من حجي العذال
وتزهك عبرتي وبعيوني يقرونك
تره بير العشك واسراره ماتنباع
وانت اسرارنا ومانكدر نخونك
يحاكمني سجن والضيم مد الشوف
كلي بياذنب حاكمت مسجونك
لا تلعب بعمري وعمري الك منذور
ييزك تلعب بعمر اليحبونك
تانيت الوفه وللفرج مامش باب
شمعه وذوبتني بنار جانونك
دغطيني بحنانك حتى لو بالطيف
وخليني كحل يازين بجفونك
أخذني بين أيديك وخل أموت هناك
ناغيني بشفافك ..عضني بسنونك
تعال الدنيا ظلمه وصدري ضايك حيل
واليوم أشتهيت أتوسد متونك
وسولفلك سوالف عن ربيع صباي
وشمك بالنحر وتغنى بعيونك
ياوردة كرنفل والصبح نسمات
ونسماتك ترد روح اليشمونك
من يوم اللجحتك واني هايم بيك
فراشة حديقه وصرت مجنونك