نهااايه المشواار ....

ادري مقصر معاك وفي محبتنا

وادري ماتدرين ليه اسباب تقصيري

لو دام حبك ولو دامت علاقتنا

انا لغيرك ياقلبي وانتي لغيري

لازم نقّوي على الفرقى عزيمتنا

لو كان بعدك سبب همي وتدميري

عجزت لا ادبر اظروف ٍ تحدتنا

ماقام حظي ولا فادت تدابيري

المجتمع والعوايد غصب حدتنا !

وإلا انتي اصلاً زيادة خير في خيري

ولو إن قربك خطا يابيض رايتنا

يزيد قدرك غلا من زود تقديري

مادنسك كذب حاسدنا وشامتنا

تبقين ورد العفاف ان زان تفسيري

لكن عزانا على الذكرى وضيقتنا

هذي حقيقه ولا داعي لتبريري

ياغايتي يوم تنهينا نهايتنا

تعالي اخذي من اوجاعي تعابيري

انا وشعري وصلنا فوق طاقتنا

احزن وحزني يحبونه جماهيري

وفيت وانتي وفيتي مير خانتنا

كل التفاكير واولها تفاكيري

واليوم ندفن بقايا حي ميتنا

ماعاد تحييّ معاذيرك معاذيري

بعيش في سكة الذكرى بدايتنا

واسير لحلامنا وانتي بعد سيري

تذكريني بياض ٍ ساد نيتنا

تذكريني ولا يألمك .... تأثيري

مع السلامه خلص واقع حكايتنا

انا لغيرك ياقلبي وانتي لغيري

وصلت لا خر محطه في مسيرتنا

تطّول مشاويرك او تقصر مشاويري